الحرامى

من طرف **adam** الأحد يونيو 13, 2010 9:34 am

الليلة انا قاعد زهجان وقرفان ووالله مابموت بي زهجي دا براي .... يعني اطرشق .... حلااااااتكم
احسن ليكم تعالوا اسمعوني قبال ما اجر ليكم عكازي المضبب دا واجيكم بره تعالوا اقعدوا فوق البنابر دي وفتحوا لي اضنينكم كويس واسكتوا عشان ابدا ليكم يلاااااا تعالوا

في حلتنا في بداية الثمانيات كانت تكثر مسألة مرتادي الليل ( الحرامية ) وكل يوم نسمع ناس فلان نط عليهم الحرامي ونسمع فلان داك الحرامي اداهو بنية شرط عينو .... وآدم الغسال لقوه مضبوح الصباح ..... الخ
اها ياسيدي الآمانتي ليك يوم الخميس كدا ناس امي قرروا يمشوا يبيتو مع حبوبتي عشان كانت متحسسة شوية وقالو انا ابيت في البيت .
امي قالت لي بتبيت براك في البيت ولا بتخاف ... قلت ليها بكل ثقة ( اخاف من شنو كمان ) ومعاها صرة وش نظام يعني السؤال دا غايظني لاني رايت فيهو شئ من الاستفزاز لانو قدام اخواتي .
المهم في الامر الجماعة ركبوا العربية ومشوا ، لحدي هنا انا كويس ... بعد ما الواطة ليلت وخاتي سريري في نص الحوش كل مرة اسمع ليك شجرة الليمون مع الرياح اقوم اقعد في نص السرير واتلفت في الحوش ومرات اسمع صوت الملاية مع الهواء تعمل فرررر ومرات تعمل طقققققققق ( شلتها لفيتها تحت المرتبة ) وتاني اسمع صوت فحيح جريد النخل بصوت عالي .... النوم يطير من عيني.
بقيت اتخيل منظر آدم الغسال اللقوه مضبوح جنب دكانو بصراااااحة النوم طار مني كلو ... بقيت افكر ياربي امشي لي صاحبي ايمن عشان يجي يبيت معاي !!!!
تاني اتخيل منظر خالتو سعاد ( ام ايمن ) وشماراتها بكرة الصباح عند بتاع الخضار قلت في نفسي والله كان الحرامي دا ضبحني ما انادي الزفت دا .... المهم فكرت كدا قمت جبت لي كمية من الحجارة والطوب والحصحاص خليتها جنب سريري كلما اسمع لي صوت ولا كشكشة تخوفني اقوم اردم ليك بيوت الجيران في كل الاتجاهات بالحجارة.
واول مااسمعهم ليك صحوا وولعوا الانوار اطمئن شوية واضحك لي ضحكة خبيثة لما اسمع صوت خالتو سعاد تقول ياناس الحلة الحقوووووونا الحرامي جانا .
بعد الموضوع دا وبي يوم ناس امي وصلو العصر ..... خالتو سعاد وحريم الحلة لمو ليك في امي بالشمارات ... وانا قاعد اسمع في كلامن
خالتو سعاد اصلا مابطيقة مرة جنها شمارات وكضب ... كان شافتني واقف براي في المحطة تجي تقول لي امي لقيت ولدك يشاغل في البنات. المهم مرة غير قالو وقلنا ماعندها شئ
نرجع لي موضوعنا ...
خالتو سعاد فكت لي امي قنيلة قالت ليها اولا بالتبادي يااختي الجانا بالليل دا ماحرامي ديل عصااااابة عديل كان قلت ليك اكتر من 15 حرامي صدقيني لانو بيتنا ردموه بالطوب وبيت عم عثمان وبيت ناس بت المنا ، والحيرني قالت ليها حتي المربوع البعدنا فلقوهم وردموهم بالطوب!َ!!!!
تاني قالت ليها والله انا شافني الحرامي وفلعني بي ماسورة وقعت في حديدة السرير جنب راسي
من الحادثة دي ايقنت تماما انو خالتو سعاد دي كضابة كضب.
امي سألتني وانت اوعي تكون مانمت بالليل
قلت ليها الغريبة ماسمعت اي شئ .

وحتي الملتقي مع حرامي تاني آآآآآقصد موضوع تاني ....

هاهاهاهاهاها Laughing

قطعت مصاريني من الضحك الله يخليك
مشاركة رائعة وفي إنتظار حرامي آخر تسلم

بالجد قصة الحرامي دي تحححححححححححححححححححححححححححححححححححححفة أضحك الله سنك ومزيد من الإبدااااااااااااااااع
الحرامى %D8%A8%D8%B1%D8%A7%D9%81%D9%88%20%D8%B9%D9%84%D9%8A%D9%83

الحرامى %D8%A8%D8%B1%D8%A7%D9%81%D9%88%20%D8%B9%D9%84%D9%8A%D9%83

من طرف **adam** الثلاثاء يونيو 15, 2010 9:34 am

شكرا ليكم ونوعدكم بالمزيد انشاء الله

من طرف محمد الفضل الثلاثاء يوليو 13, 2010 5:51 pm

يا ادم يا أبني الحكاية بالجد جميلة وانت راجل مبدع بدون شك .... _ بس يعني بدون زعل _ أنا لاحظت حاجة ...انت قلت القصة دي حدثت في بداية الثمانينات وانت عمرك 20 سنة ...يعني عمرك كان الزمن داك (سالب عشرة سنة)... أنا ما عايز اقول أنو في حاجات مشتركة بينك وبين خالتك سعاد
...يا أبني يا أدم (انت متأكد أنك ما أدم النزلوهو من الجنة؟؟؟؟؟)

من طرف ابوعمار الأحد يناير 09, 2011 4:04 am

جميل أخي آدم والله قمة الإبداع و استمتعت جدا بهذه القصة الرائعة و أترقب جديدك يا غالي

من طرف **عابدة الرحمن** الأحد يناير 09, 2011 9:54 pm

ههههههههههههههههههههههه والله خالتك سعاد مبالغةةةةةةةةةةةة دي شكلها نوع البقول ليك ناس المغابر قامو
Laughing

من طرف foadarhmtalla الإثنين يناير 17, 2011 1:02 am

هههههه لذيذه وملعوبه مبااااااااااالغه عسل بس , يلا طلع من بيت الكلاوي يا خالو ادم

الحرامى

الحرامى

رد: الحرامى

رد: الحرامى

رد: الحرامى

رد: الحرامى

رد: الحرامى

رد: الحرامى

رد: الحرامى